കരിമണ്ണൂർ
ഗ്രാമ പഞ്ചായത്ത്

ഇടുക്കി ജില്ലയിലെ തൊടുപുഴ താലൂക്കിൽ ഇളംദേശം ബ്ലോക്ക് പഞ്ചായത്തിൽ കരിമണ്ണൂർ, നെയ്യശ്ശേരി എന്നീ വില്ലേജുകളുടെ പരിധിയിലാണ് കരിമണ്ണൂർ ഗ്രാമപഞ്ചായത്ത് സ്ഥിതി ചെയ്യുന്നത്.

33.33 ചതുരശ്ര കിലോമീറ്റർ വിസ്തീർണ്ണമുള്ള പഞ്ചായത്തിന്റെ ഭൂപ്രകൃതി ചെറുതും വലുതുമായ കുന്നിൻപ്രദേശങ്ങളും അവയ്ക്കിടയിലെ താഴ്വരയിലെ സമതലങ്ങളും ചേർന്നതാണ്.

സഹ്യപർവ്വതസാനുക്കളുടെ പടിഞ്ഞാറേ അറ്റത്തുള്ള മലനിരകളുടെ സാമീപ്യമുള്ള പഞ്ചായത്താണ് കരിമണ്ണൂർ. ചെറുതും വലുതുമായ കുന്നിൻപ്രദേശങ്ങളും അവയ്ക്കിടയിലെ താഴ്വരയിലെ സമതലങ്ങളുമാണ് പഞ്ചായത്തിന്റെ ഭൂപ്രകൃതിയുടെ പൊതുസ്വഭാവം.

പഞ്ചായത്തിന്റെ തെക്കേ അറ്റത്തുള്ള ഉമ്മടക്കിൻതണ്ട്- കാരാപ്പിള്ളി മലകൾക്കും വടക്കേ അറ്റത്ത് നാരുംകാനം മലയ്ക്കും ഇടയ്ക്ക് സമതലങ്ങളെ വിഭജിച്ചുകൊണ്ട് നെല്ലിമലത്തണ്ട്, മനക്കത്തണ്ട്, മിഷ്യൻ കുന്ന്, മരുതുംപറപാറ, കണ്ണാടിപ്പാറ തുടങ്ങിയ മലനിരകൾ സ്ഥിതി ചെയ്യുന്നു.

നിമ്നോന്നതമായ ഭൂപ്രകൃതിയും ഹരിതാഭമായ നെൽവയലുകളും കിഴക്കു പടിഞ്ഞാറായി ഒഴുകുന്ന പ്രധാനപ്പെട്ട തോടുകളും തൊമ്മൻകുത്ത് ഉൾപ്പെടുന്ന കണ്ണാടിയാറും സമീപമുള്ള വനപ്രദേശങ്ങളും ചേർന്ന് പ്രകൃതിമനോഹരമായ ഒരു ഭൂപ്രദേശമാണ് കരിമണ്ണൂർ.

ഈ പ്രകൃതിസമ്പത്തുകൾ മൂലം കരിമണ്ണൂർ ഇന്ന് ടൂറിസം ഭൂപടത്തിലും ശ്രദ്ധേയമായ സ്ഥാനം നേടിക്കൊണ്ടിരിക്കുകയാണ്.

ചരിത്രം ഉറങ്ങിക്കിടക്കുന്ന കോട്ടപ്പുറം- കമ്പംകോട്ടയുടെ ഇരുഭാഗങ്ങളിലായി സ്ഥിതി ചെയ്യുന്ന കരിമണ്ണൂർ പഞ്ചായത്ത് നൂറ്റാണ്ടുകളുടെ സംസ്കൃതിയും പാരമ്പര്യവുമുള്ള ഒരു ഗ്രാമപ്രദേശമാണ്.

പഞ്ചായത്തിലെ 5, 7 വാർഡുകളിലൂടെ കിഴക്കുപടിഞ്ഞാറായി 100 ലിങ്ക്സ് വീതിയിൽ സ്ഥിതി ചെയ്തിരുന്ന കോട്ട കീഴ്മലൈനാടിനെയും മേൽമലനാടിനെയും വേർതിരിച്ചിരുന്നതായും, അല്ലെങ്കിൽ വടക്കുംകൂർ, തെക്കുംകൂർ രാജ്യാതിർത്തികൾ നിർണ്ണയിച്ചിരുന്നതായും രണ്ട് അഭിപ്രായങ്ങൾ നിലവിലുണ്ട്.

കോട്ടക്കിടങ്ങിലെ ജലാശയത്തിൽ ചീങ്കണ്ണി, മുതല തുടങ്ങിയ ജന്തുക്കളും ഇരുവശങ്ങളിലും ഇല്ലിത്തുറുവും ഉണ്ടായിരുന്നുവെന്ന് പഴമക്കാർ പറയുന്നുണ്ട്. കരിമണ്ണൂർ പഞ്ചായത്തിലെ പ്രധാനപ്പെട്ട ചരിത്രസ്മാരകങ്ങളിലൊന്നാണ് ഈ കോട്ട.

കേരളത്തിൽ അത്യപൂർവമായ വരാഹക്ഷേത്രങ്ങളിലൊന്നായ പന്നൂർ ശ്രീ വരാഹസ്വാമി ക്ഷേത്രം ത്രേതായുഗത്തിൽ സ്ഥാപിക്കപ്പെട്ടതാണെന്ന് പറയപ്പെടുന്നു.

ചിരപുരാതനമായ കാർത്ത്യായനീ ദേവി ക്ഷേത്രം, നാല്പതേക്കറിൽ വനമധ്യത്തിൽ സ്ഥിതി ചെയ്യുന്ന ശാന്തികാട്ട് ഭഗവതി ക്ഷേത്രം, മുളപ്പുറത്തുള്ള മലയത്താമ്പുറം ശാസ്താക്ഷേത്രം, പുതിയറ ശിവക്ഷേത്രം, ചന്ദ്രപ്പിള്ളിക്കാവ്, പന്നൂർ അയ്യപ്പക്ഷേത്രം, എലമ്പിക്കാട്ട് ക്ഷേത്രം, എടത്തിൽ ധർമ്മശാസ്താക്ഷേത്രം, ആമ്പക്കുടി ശ്രീധർമ്മശാസ്താക്ഷേത്രം എന്നിവ പഞ്ചായത്തിന്റെ പഴയകാല ചരിത്രത്തിന്റെ സാക്ഷിപത്രങ്ങളാണ്.

കരിമണ്ണൂർ പഞ്ചായത്തിന്റെ ആസ്ഥാനപ്രദേശങ്ങളിൽ ഭൂരിഭാഗവും ഇഞ്ചപ്പിള്ളി ഇല്ലത്തിന്റെയും പന്നക്കൽ മനയുടേയും (കുഞ്ചിറക്കാട്ടില്ലം) വകയായിരുന്നു.

ഇപ്പോൾ പഞ്ചായത്ത് ആസ്ഥാനമായ കരിമണ്ണൂർ ടൗൺ പ്രദേശം പന്നക്കൽ മന വകയായിരുന്നതിനാൽ കരിമണ്ണൂർ ടൗണിനെ പണ്ട് “പന്നക്കാമറ്റം” എന്ന പേരിലാണ് അറിയപ്പെട്ടിരുന്നത്.

പഞ്ചായത്തിലെ മറ്റു പ്രദേശങ്ങളിൽ ഭൂരിഭാഗവും വനപ്രദേശങ്ങളും കുറെ ഭാഗം പണ്ടാരപ്പാട്ടാടിസ്ഥാനത്തിലുള്ള സർക്കാർ ഭൂമിയുമായിരുന്നു. നിലങ്ങൾ കൂടുതലും തൊടുപുഴ ദേവസ്വത്തിന്റെയും പോറ്റിമാരുടേയും അധീനതയിലായിരുന്നു.

ജന്മി-കുടിയാൻ, അടിമ-ഉടമ സമ്പ്രദായങ്ങളും നാടുവാഴിത്തവും നിലനിന്നിരുന്ന കാലഘട്ടത്തിൽ പണ്ടാരപ്പാട്ടം അടിസ്ഥാനത്തിലുള്ള സ്വതന്ത്ര ഭൂഉടമസ്ഥതയും ഇവിടെ നിലനിന്നിരുന്നു.

പതിനെട്ടാം നൂറ്റാണ്ടിന്റെ ആദ്യപകുതി മുതൽ കരിമണ്ണൂരിലേക്ക് വ്യാപകമായ കുടിയേറ്റം ഉണ്ടായി. മീനച്ചിൽ താലൂക്ക്, ഇലഞ്ഞി, കൂത്താട്ടുകുളം, മുത്തോലപുരം, ആരക്കുഴ തുടങ്ങിയ പ്രദേശങ്ങളിൽ നിന്നായിരുന്നു പ്രധാനമായും കുടിയേറ്റം.

സ്വന്തമായ അധ്വാനത്തോടൊപ്പം അധഃസ്ഥിത വിഭാഗങ്ങളെയും ഇവർ കൃഷിപ്പണിക്കായി ഉപയോഗിച്ചിരുന്നു. അക്കാലത്ത് നിശ്ചിതമായ കൂലിവ്യവസ്ഥ ഉണ്ടായിരുന്നില്ല.

കഴിഞ്ഞ നൂറ്റാണ്ടിന്റെ ആദ്യദശകങ്ങളിൽ ഇവിടെ പ്രധാനമായും നെൽകൃഷിയായിരുന്നു. പാടശേഖരങ്ങളിൽ മാത്രമല്ല കരപ്രദേശങ്ങളിലും വ്യാപകമായി നെൽകൃഷി ചെയ്തിരുന്നു. “വിരിപ്പ് കൃഷി” എന്ന പേരിലാണ് കരകൃഷി അറിയപ്പെട്ടിരുന്നത്.

ഇന്ന് പഞ്ചായത്തിലെ പ്രധാന വിളകൾ റബ്ബറും തെങ്ങുമാണ്.

ഇംഗ്ലീഷ് വിദ്യാഭ്യാസം ലഭിക്കുന്നതിന് സമീപപ്രദേശങ്ങളിൽ പ്രധാന ആശ്രയം തൊടുപുഴ ഗവ. ഇംഗ്ലീഷ് സ്കൂളായിരുന്നു.

ആദ്യകാലത്ത് മിക്ക രോഗങ്ങൾക്കും ആശ്രയം ആയുർവേദ നാട്ടുവൈദ്യന്മാരുടെ ചികിത്സയായിരുന്നു.

മാതാളികുന്നേൽ വൈദ്യൻ, വട്ടക്കാവിൽ മാണിവൈദ്യൻ, പോട്ടശ്ശേരിൽ വേലായുധൻ വൈദ്യൻ, ഗോപാലപിള്ള വൈദ്യൻ, ബാലചികിത്സയ്ക്ക് പ്രസിദ്ധനായിരുന്ന കുന്നേൽ വക്കൻ വൈദ്യൻ, ഗോവിന്ദൻ വൈദ്യൻ തുടങ്ങിയവർ പ്രസിദ്ധരായ വൈദ്യന്മാരായിരുന്നു.

അലോപ്പതി ചികിത്സ ആവശ്യമായപ്പോൾ കാരിക്കോട് ഗവ. ആശുപത്രിയായിരുന്നു പ്രധാന ആശ്രയം. 1940-ന് മുമ്പ് കാളിയാർതോട്ടം ഡോക്ടറും അലോപ്പതി ചികിത്സയ്ക്കുള്ള മറ്റൊരു ആശ്രയമായിരുന്നു.

പഞ്ചായത്തിലെ ആദ്യത്തെ പള്ളി നെയ്യശ്ശേരി കത്തോലിക്കാ പള്ളിയാണ്.

മുസ്ലീങ്ങളുടെ ആദ്യത്തെ ആരാധനാലയം നെയ്യശ്ശേരി പള്ളിയായിരുന്നു.

ഗതാഗത സൗകര്യങ്ങളുടെ അപര്യാപ്തത കൊണ്ട് ഒട്ടേറെ ബുദ്ധിമുട്ടുകൾ അനുഭവിച്ചിരുന്ന പ്രദേശമാണ് കരിമണ്ണൂർ.

താലൂക്കാസ്ഥാനവും വ്യാപാരകേന്ദ്രവുമായ തൊടുപുഴയുമായി ബന്ധിപ്പിച്ചിരുന്ന ആദ്യകാല പാത തൊടുപുഴ – അണ്ണായിക്കണ്ണം – തേക്കിൻകൂട്ടം – പന്നൂർ – ചെപ്പുകുളം വില്ലേജ് റോഡായിരുന്നു.

ഈ വഴിയിലൂടെയാണ് ഗ്രാമത്തിലെ കർഷകർ വാണിജ്യവിളകൾ തലച്ചുമടായി തൊടുപുഴയിലെത്തിച്ച് വിൽപ്പന നടത്തുകയും തിരിച്ച് നിത്യോപയോഗ സാധനങ്ങൾ വീട്ടിലെത്തിക്കുകയും ചെയ്തിരുന്നത്.